الاحساس الجميل

أجمل إحساس لوم النـاس وش يعنـي
لاصرت لاتكتـب أحزانـي ولا تقـرا

إن جيـت أزورك تقابلنـي تودعنـي
وإن جيت أوادعك قلت جروحنا خضرا

بيـن إنتظـارٍ قطعتـه ليـن ضيّعنـي
وحبال وصلك وغبات الهوى الكبـرا

أغيب وأشتاق وآخـر ليـل يجمعنـي
على مواويلك ألقـى للغـلا مسـرا

أهد الأحلام في ساعـة لقـى وأبنـي
قصرٍ تخيلـت فيـه أشواقنـا عـذرا

صـدك وذكـراك تنقذنـي وتغرقنـي
وأنا إبتسامات وقتـي كلهـا صفـرا

كم سقت أمانيك ياغيـثٍ تواعدنـي
يمسي خيالي خضار وواقعـي صحـرا

ياأجمل إحساس قول أسمعـك وإسمعنـي
يمكن معـك نتفـق وجروحنـا تبـرا

أما إنـي أقنعـك ولاّ قـول وإقنعنـي
لو قالوا القلب سوق البيـع والمشـرا

إلا أن ودك بعـد صـدك تفارقنـي؟
غدرى لياليـك مثـل أفعالهـا غـدرا

لاصرت تامر وأطيعك كيـف تمنعنـي
علمتني لو عصيتك ماكسبـت أجـرا

يا أجمل إحساس كل اللوم وش يعنـي
مادمت لاتكتـب أحزانـي ولا تقـرا